सानोमा कापी किन्ने पैसा नहुँदा आफ्नै पुरानो कापीलाई पानीमा भिजाएर, सुकाएर फेरि पढ्ने बालक।
खाजा खाने पैसा नहुँदा आधा किलो सखर र थोरै नरिवल पगालेर पुष्टकारी बनाउने र साथीहरूलाई बेच्दै पहिलो व्यवसायमै ६० रुपैयाँ कमाउने साहसी विद्यार्थी।
यसरी सुरु भएको जीवन–संघर्षले आज अर्जुनसिंह ठकुरीलाई एक सफल उद्यमी, एक प्रेरक नेता, र धेरैको जीवनमा असल मित्रका रूपमा स्थापित गराएको छ।
अर्जुनसिंह ठकुरी मेहनत, लगनशीलता र दृढसंकल्पको प्रतीक हुन्।
२०७० सालको नेपाल बन्दमा उनले आफ्नै गाडीमा “नेपाल खुल्ला छ” भनेर टाँसेर सडकमा हिँडेका दृश्य अझै पनि धेरैको स्मृतिमा ताजा छ।
त्यसले उनलाई निडर, परिवर्तनकारी र आशावादी युवाको रूपमा चिनायो।
त्यही आत्मविश्वास र नेतृत्व क्षमताले उनलाई विवेकशील नेपाली पार्टीको संस्थापक उपाध्यक्षसम्म पुर्यायो।
राजनीतिक अभ्यासपछि उनले उद्यमशीलताको बाटो रोजे।
आज उनी सूचना प्रविधि, शिक्षा र पर्यटनजस्ता क्षेत्रमा सफलता हासिल गरिरहेका छन्।
उनका ४–५ वटा आइटी कम्पनीहरू, विलसन एकेडेमी हाइ स्कुल, ॐ अध्याय रिट्रेट रिसोर्ट, कुलेखानी एडभेन्चर, र माउन्टेन भिस्टा रिट्रेट नगरकोट जस्ता उद्यमहरू उनलाई मात्र नभई देशकै युवा उद्यमशीलताको अनुकरणीय नमुना बनाउँछन्।
अर्जुनसिंह ठकुरीको यात्रा केवल व्यक्तिगत सफलता मात्र होइन, राष्ट्रलाई आवश्यक परिश्रमशील र सृजनशील युवाको प्रतिनिधित्व पनि हो।
यस्ता ‘अर्जुन’हरू सफल भए मात्र देशले समृद्धिको लक्ष्य हासिल गर्नेछ।
आज ४४ औँ जन्मदिनको विशेष अवसरमा बार्दली न्यूजको तर्फबाट अर्जुनसिंह ठकुरीलाई हार्दिक शुभकामना।
साथै उनको संघर्ष, साहस र सफलताको यात्रा आगामी दिनहरूमा अझ उज्ज्वल रहोस् भन्ने कामना।
